Diaranson anohi Dep. Nacional ta enfrenta R.C.A y ta gana R.C.A. 3-2. Half-time a bai aden cu e wega empata na 2 gol pa banda.  Apesar cu tricolornan di Solito esta RCA ta keda lidera e campeonato di futbol Division di Honor, ariba diferencia di gol despues cu diaranzon anochi nan ta perde sorpresivamente cu Deportivo Nacional cu e score di 3 - 2. RCA ta cuminsa e wega den bon pia habriendo e marcador 1 - 0, cu gol anota pa Roman 'Ale' Aparicio, pero Deportivo Nacional ta bini bon bek y ta anota dos gol pa medio di Josef Frantz y Roderick Lampe. Na di ultimo minut den e prome tempo, e bolante Jomar Martis ta anota un bunita gol, for di banda drechi di e tereno, e ta crusa un bala na unda esaki ta pega den e net banda pabou, asina RCA ta empata 2-2 y asina halftime ta bai aden. Den di dos tempo nos por a mira un RCA mas mihor planta ariba tereno, usando si aleronan veloz, nan a domina e medio campo bastante bon y a haya algun oportunidad pa anota pero nan no ta probecha. Un tiro liber di George ta pasa banda di e palo di gol bai afor. Mester bisa cu pa basta rato portero Maestre di RCA no a haya peliger pa su porteria, mientras cu Deportivo Nacional a mustra cansa den e di dos tempo, sigur den e medio campo cu Henry y Alberto Geerman. RCA su plantela ta hopi jong y ta move rapido ariba tereno, esaki ta haci cu Nacional tabata haci esfuerso extra pa logra hunga posicion di bala, na unda RCA ta persiona hopi, asina mes nan a sa na wanta duro cu un Theric Ruiz comandando e defensa.
Pero pa e muchanan di Noord nos tin un famoso dicho cu semper a ser usa pa Deportivo Nacional, tanten e referee no fluit pa e wega termina Deportivo Nacional ta keda un equipo peligroso. Na di 76 minut, e defensa central di Deportivo Nacional Theric Ruiz ta bati portero Maestre pa e 3 - 2 y asina duna su equipo e victoria cu tanto nan tabata tin mester di dje. Cu e victoria aki Deportivo Nacional ta completamente bek den e race pa un lugar den e playoffnan final cu Don Silo Brete na mando. Pa loke ta RCA, nan no a conoce un bon comienso den e di dos buelta, prome ta empata cu Riverplate y awor ta haya derota na man di Nacional, pues un punto den dos wega. Mester bisa cu durante halftime, Chua Farro miembro di AVB a anuncia cu algun equipo na Aruba tambe a reforsa cu algun hungador di exterior a duna ehempel di  Sportboys cu a bini cu un hungador di Hulanda, Bubali a haya un hungador di Boneiro y Estrella a haya Alex Conceciao cu ta hungando pa su equipo na Venezuela y falta ainda su transferencia pa Aruba. Kiermeen pa locual ta trata e di dos vuelta lo bira masha enterensante pasobra 3 equipo lo ta bringando pa campeon di campeonato regular cu ta R.C.A., La Fama y Britannia. Y e di cuater puesto ta wordo sumamente dura bataya pa e dos equiponan di Noord esta Dep. Nacional y Bubali. Un di e dos equiponan aki lo tin e honor di representa Noord den e 1/4 final di Aruba su futbol. Mientras den e parti abow di e tabla di posision tambe varios equipo lo mester bataya fuertismo cu otro pa wak cua equipo na final mester degrada. Dakota, Brazil Jrs., Sport Boys y Estrella ta den un pososion delicado.