Diasabra atardi, e campeonato di futbol Division di Honor a continua ora ci e punteronan esta SV Britannia a enfrenta e equipo di Brazil Jrs, kendenan ta na di ultimo lugar ariba e tabla di posicion
Nos por bisa cu deb e minutnan inicial, e wega a cuminsa ariba un bon ritmo, e muchanan di Brazil Jrs tog sigur liher ariba cada hugada, strobando bon, di otro banda un Britannia kizas poco lento na e bala y pasando esaki rond, no ta logra sorprende tempran, balanan pasa pa otro ta ser perdi of intercepta pa e veloz hungadornan di Brazil Jrs. Sinembargo na di 5minut di wega, e alero Chando de Lange ta haya e prome bon oportunidad, pero e bala ta dal malo na su canti pia y pasa dilanti gol bai pafor. Un rato despues por a mira e delantero di Brazil Jrs, kende ta purba di sorprende e portero Werleman cu un tiro di lew, pero e ultimo a anticipa bon. Mester bisa cu pa Britannia e tabata dificil pa penetra den un Brazil Jrs defensivamente fuerte, nan a para cu ocho a nuebe hende den defensa y no a laga e espacio pa e equipo di Britannia por a drenta, tog na di 16min, nos ta haya e prome bon tiro di Marlon Andrea, pero su bala ta pasa na banda. Asina mes cu Brazil Jrs a trata tur manera pa pone e defensa ariba e area penal y no laga Britannia yega mucho cerca di e gol, algun biaha Britannia ta toka bon tog penetra. Na di 23minut, ariba un pifia di e defensa central di Brazil Jrs ta pone Chando duna Marlon un bala di careda den e area penal, Marlon na su turno ta tira duro, pero e portero hoben di Brazil Jrs ta pomp e bala manda corner. Dos minut despues un hugada individual di Marlon na unda e bala ta dal den tubo, pero den e robete Dedo Lake ta haye cu gol bashi, den un forma increibel su bala ta pasa over di e gol, un otro oportunidad ta desperdicia pa e equipo di Piedra Plat. Na di 35min, porfin e gol ta cai pa e equipo di Britannia pa e 1 - 0, ora cu e defensa di Brazil Jrs no ta sigui e hugada y rechasa e bala, aki Marlon Andrea ta kop e bala simplemente den e gol bashi. Tres minut despues, ta Chando de Lange ta ricibi un paso largo di Dedo, aki Chando ta mira e portero sali for di su gol y ta lob e bala over di su cabez pa e 2 - 0. Aki por a mira claramente cu Brazil Jrs a cuminsa bai cu mas hende dilanti y e wega a habri full for di otro y a duna Britannia mas espacio y e oportunidad di yega mas facil na e gol. Remarcabel ta cu pa casi diezcinco minut e portero Werleman no a haya bala den e wega. Un minut prome cu half e bolante Rojas ta haya un bon 'steekpas' di Dedo Lake, pero e ta tira malo den man di e portero di Brazil Jrs.
Segundo tempo
Den e segundo tempo nos por a mira un Britannia mucho mas mihor ariba tereno. Apenas cinco minut hungando, e defensa di Brazil Jrs ta mishi e bala cu su man, aki referee Rudy Angela ta pita penalty y ta saca e hungador nr.14 for di wega, Dedo Lake ta tira bon den skina drechi pa e 3 - 0, pa Britannia. Tres minut despues Richard Rojas ta anota e 4 - 0, tras di un bala breed pasa di Marlon Andrea, kende no ta egoista y ta duna su companero Rojas pa e anota. Na di 61min, Brazil Jrs ta haya e unico chens, un bala tira di banda drechi ta dal den tubo y bai afor. Pero esey tabata tur tambe pa e equipo di Pariba di Brug. Despues di esaki tur cos tabata Britannia, aunke nan ta anota tres gol mas, nan a cuminsa bira poco non-chalant cu e oportunidadnan di gol. Faltando apenas tres minut pa e partido termina nan ta anota tur tres gol. Na di 86 y 88min, Nino Nunez ta anota dos gol tras di otro pa e 5 - 0 y 6 - 0, ni un minut despues Dedo Lake ta anota gol number 7 y e ultimo pa e equipp di Piedra Plat. Cu e victoria aki SV Britannia ta bai pa 26 punto y ta keda firme na promer lugar, mientras Brazil Jrs ta keda na di ultimo lugar cu 8 punto.