Mundo Deportivo a hiba Jermeen 'Yuwana' 'Jo' na su ultimo lugar di sosiego. No tin palabra pa describi loke nos a experiencia diasabra na e despedida di Jermeen Robert, conocido futbolista como tambe coredor di drag. Prome nos a bishita e tereno di La Fama den cual club di futbol, Jo a milita ultimo, aki nos a sinti cu tur hende presente tabata conmovi pa e perdida di un ser masha keri, Sr Giovanni Croes di La Fama a hiba palabra na esnan presente, na final e hungadornan di La Fama Lifida, La Fama Volleyball cu blaas berde y blanco den man, a despedi di Jo. E di dos stop di e caravana a para na tereno di Britannia, un club cu Jo a milita dos anja den dje. Despues di un recorido rond di e tereno, cu Britannia y Riverplate Lifida hunto cu e directiva di Britannia a para y saluda Jo pa di ultimo biaha. Presidente di Britannia, sr. Eddie Berg, emociona, a haci entrega di e flenel number ocho di Jo, na su compremetida Shanni. E caravana a sigui despues pa RCA, e club cu Jo a cuminsa su carera na un edad jong. Na RCA, e directiva hunto cu algun hungador y entrenador a tuma despedida di Jo. Presidente di RCA, sr. Eduard Pietersz y ex-entrenador di RCA, sr. Veron Alberts a dirigi palabra na esnan presente, bunita tabata ora cu e brommernan a core rond di veld di RCA y race esaki, un manera cu Jo semper a drenta e club, tempo e tabata bin entrena futbol na dicho club. Por ultimo, Raymondt Pimienta, Joy Roza y Veron Albertsz a scop bala na honor di Jo. Mester bisa cu recorido na tur tereno, a conmove nos. E merdia ey nos a dedica e programa radial Real Sports, por completo na honor di Jermeen. Na misa di Paradera, centenares di persona a bini hunto y despedi di Jo, algun persona a hiba palabra recordando e bunita historia di Jo. Tanto e equiponan di La Fama y di RCA, coleganan di Drag y muchanan di bario a para den guardia di honor pa asina rindi e ultimo honor na Jermeen 'Jo', 'Yuwana', 'Numsy', 'Jo Maximus', 'Jeremy' Robert. Cu Jermeen sosega na Paz, den brasa di Senjor. Den nos Gallery tin mas cu 430 potret di Jo Robert DFM, click riba dje y admira tur esakinan |