Diabierna anochi den C.D. Guillermo P. Trinidad a ser hunga un wega den futbol Division di Honor entre Britannia y Deportivo Nacional. E wega a ser para siman pasa dor di entiero di Jermeen "Yuwana" Robert y a sigui diabierna. Mester bisa cu pa ambos equipo e wega tabata uno sigur importante mirando cu ta trata aki di dos equipo bon para pa loke ta e tabla di posicion. Un SV Britannia na promer lugar y un Deportivo Nacional na di tres lugar. Pa loke ta e wega mes, mester bisa cu esaki a bai bon y ariba un nivel bastante aseptabel, un Deportivo Nacional cu a haya algun oportunidad clave, pero portero David Lacle di Britannia cu a luci bon e anochi aki, di otro banda nos tin cu bisa cu Britannia tampoco no a keda atras y nan tambe a crea bastante oportunidadnan pa habri e marcador pero e punteria simplemente no tabata tey. Balanan tabata dal na palo y tubo na algun ocasion, pero den gol mes ningun no kier a drenta. E wega ta caba 0-0, esaki ta nifica cu Britannia ta keda na promer lugar y Deportivo Nacional na di tercer lugar. Diasabra 13 maart lo tin e otro partido cu tambe a wordo para pa motibo di entiero di Jermeen, cual lo ta entre La Fama y Riverplate esaki pa 8.00 den Guillermo Trinidad. E wega aki tambe ta di suma importancia tumando na cuenta cu Riverplate kier gana y sali for di e zona di degradasion, mientras cu un victoria pa La Fama ta nifica cu nan lo bai empata cu Britannia na prome lugar. Di tur manera nada no ta scirbi ainda y tin 6 team cu ta bringando pa clasificacion. E proximo wega di Britannia ta diasabra awor den un duelo entre e eterno rivalnan esta Britannia vs Estrella.